CORONICA ARAGÓN-LiTUANiA, por Chabi

Ayere, mierques, teniemos a oportunidat de beyer a nuestra selezión nazional de básquet masculín, en o Pabellón Monezipal d’Esportes de Uesca. Yera o segundo partito, agora cuentra Lituania, dimpués d’o de l’añada pasata, fren á Uruguai. Á pesar d’as importans baxas d’os ACB Rodrigo San Miguel (Balladolit, a temporada benién), Lucio Angulo (Alacant) e Jesús Cilla (Manresa, que yera en o banquet, pero no pas con ropa de chugar), Aragón presentaba una intresán plantilla, con Nacho Ordín, Maluenda (ambos son puyatos á l’ACB ista añada), Alberto Angulo (Leida) e Rafa Vidaurreta (finalista en l’ACB con l’Estudiantes), como prenzipals chugadors.

Bi abió bellas 1500 u 2000 presonas, con buena presenzia de siñals aragoneses, tanto a cuatribarrada como a estrelada. Tamién b’eba bels lituans dezaga o banquet besitán. Antis d’escomenzipiar sonoron os innos nazionals de Lituania, España y Aragón, per iste mesmo orden. Ba estar rediclo de tot aber de sentir-ne l’español en un partito Aragón-Lituania, pero asinas ye iste país. Bels chuflitos isolatos, e res més. Cal apuntar que l’añada pasata, no gosó sonar en o pabellón zaragozano.

Zaga un penible escomienzo de partito, en o que rezibiemos un parcial de 1-12, os aragoneses fuen asolando-sen e fendo minguar as grans esferenzias inizials, dimpués d’un tiempo muerto demandato per l’entrenador aragonés. Á l’escanso se i arribó con una desabentalla de bels diez puntos, pero a imachen d’Aragón yera cambeata e as asperanzas yeran posatas en a segunda parti. En o terzer cuarto, as prebas d’o equipo aragonés no achiquiban a esferenzia á menos de zinco puntos e o tiro esterior d’os lituans funcionaba perfeutamén. A zaguer aprosimazión d’a nuestra selezión nazional ba produzir-se á uns siete menutos d’a fin d’o partito, con una chugada de dos més un ta Nacho Biota, que podió dixar-nos á només tres puntos. O uescano erró lo tiro libre e d’astí t’adebán Aragón no ba poder remontar. Á poquet, os lituans fuen imposando a calidat e l’orden esfensibo e mientres tot o partito ebidenzioron un més gran rodache coleutibo, como ye de dar, que no pas a nuestra selezión. O resultato final de 68-90 nos dixa una mica tarcual, pero tamién cal fer notar que ixos 22 puntos d’abentalla los prenioron cuasi de tot en os zaguers menutos d’o cuatreno cuarto e que debán tenébanos l’autual campiona d’Europa, que encara que no contaban con os suyos millors chugadors, en teneban sobrebuens.

Nacho Ordín no chugó á o suyo millor libel e s’abió de retirar lesionato en o zaguer cuarto. Fuen A.Angulo y Maluenda os que més s’embrecoron en o chuego. Manimenos, tamién cal dizir que Rafa Vidaurreta, con a suya luita contina en a zona, Legasa e un choben Gayán fazión un partito prou completo.

Respeutibe os lituans, una gran esfensa, muito fuerte, mesmo fura en bels intes. Benioron á ganar, no pas á paseyar-sen, e ixo se ba notar en o parquet. Ba destacar o suyo numbro 7 (Serapinas, 16 puntos), que nos ba foter uns cuantos triples cuan més mal nos podeba fer.

Quí sape o paper que podría fer Aragón si podés chugar internazionalmén, con més paranza, que no istos partitos amistosos, e con toz os suyos chugadors disposables. Soniar, costa bien poquet.